آیریلیقا گئدن یوللار

یوردومون قارا گیله سی

یوردومون قارا گیله سی

سنه اویله داریخمیشام کی

سنینله قارارلاشیب گوروشدویوم خیابانلارا

ال اله گردییمیز او خلوت کوچه لره

اینان اویله داریخمیشام کی

قارا گیلم

بوردا هر نه قوربت دادی وئریر

یئدیغیم چورک

ایشدییم سو

چکدییم هاوا

یئریدیغیم آسفالت بئله

بوردا قیزلارین عطری قوربت ایی وئریر

گوزلرینه ایکی اوزلولوک گوزلویو

و دیرناقلارینا یالانچیلیق بویاسی وورورلار

قارا گیله م

او خلوت پارکدا گزدییمیز

ال اله و چیین چیینه

بوردا بوتون پارک لار

سنین اللرینین ایستیسینی

اوره ییمه ایسی قانیلا دامیزدیریر

قارا گیله م

بوردا...

من سنه لاییق بیریسی اولمادیم

من سنه وفالی بیریسی اولمادیم

دونیا نه اولور منی باغیشلا

یوگونان جیسمیمی یاغان یاغیشلا

نه اولور منی آز قارغیشلا

یاغدیر یاغیشی یوسون جیسمیمی

ایسلات سولانسین بوتون گوناهلار

یورولدوم دونیا وور منی وور آپار

باغیشلا دونیا منی باغیشلا

باغیشلا دونیا منی باغیشلا

خزان چاغی آغاجلارین یاپراغینین توکولمه سی

اللرینین اللریمه بوکولمه سی

یاپراغلارین آیاغ آتدا ازیلمه سی

خیشیلتی سی! حزین سسی!

سن آغلادین آیریلیقدان سوز آچاندا

گوزلرینده آیریلیغین نغمه سینی بسته لییب

گوز یاشینلا‌

یاپراقلارین حزین سسی

آیریلیغین ماهنی سینی تاماملادی